Na súa orixe, o programa “ Philosophy for Children” propoñíase, nin máis nin menos, que os nenos fixesen filosofía desde as idades máis temperás, desenvolvendo na aula, concibida como unha comunidade de investigación, un amplo conxunto de habilidades de pensamento. Para iso, un elemento moi importante era a posta en práctica de recursos lóxicos vinculados á capacidade de argumentación. Ann Sharp puxo unha énfase especial nun detalle moi importante para os propósitos do programa: non só se trataba de axudar aos nenos para desenvolver un pensamento crítico e creativo, senón tamén coidadoso. Como sinala outra compañeira, Carmen Loureiro, dentro do programa que Lipman e Sharp legáronnos, todo empezou a encaixar: teoría e práctica; pensamento, sentimento e acción; texto e contexto; individuo e sociedade; bioloxía e cultura; arte e filosofía…vida e morte.